Genesis 15
Anutunöŋ Abrambuk jöhöjöhö areŋ ahök.
1Mewö asuhuiga Abramgö jeŋi meleŋniga imut ehiga Kembunöŋ keu kewö jii kaiga mörök, “Abram, gi keŋgötki kude mötman. Nöŋön göhö sumanga akzal. Göhö töwagi mönö keta bölökŋi aka ahöma.”2Keu mewö kayökmö, Abramnöŋ kewö jiyök, “O Kembu ketaŋamni, ni nahönböratni qahö malbiga töwa niŋginöŋga miaŋön mönö denöwö bauköm niŋgibawak? Nöŋön kömumbiga Damaskus azi Eliezer yaŋön nöŋgö sukinapnaŋgö toŋi akŋa.” 3Mewö jiba toroqeba kewö jiyök, “Göŋön gwölönarökni kun qahö niŋginöŋaŋgöra nup azini bohonŋan nöŋgö mire maljawi, yaŋön mönö nöŋgö öröyuaini pakpak buŋa qem aŋguma.”
4Mewö jiiga Kembugöreŋ keu jit kun mi yaŋgöreŋ kewö kaiga mörök, “Azi miaŋön sukinapkahö toŋi qahö akŋapmö, nangi silegeyök morö nahön kun asuhumawi, yaŋön mönö göhö öröyuaigi pakpak buŋa qem aŋguma.” 5Keu mewö kaiga Anutunöŋ Abram waŋgita gumnöŋ geba keu kewö jii mörök, “Mönö suepnöŋ unöŋ öŋgöiga seŋgelau oyoŋ engimanaŋgö dop akŋa ewö, mi mönö ölöp oyoŋ eŋgiman. “Mewö jiba kewö toroqeba jiyök, “Göhö gwölönarökurupki yeŋgö qötöŋinan mönö miaŋgö dop akŋa.”
6Mewö jiiga Abramnöŋ Kembu möt narim waŋgiiga mötnaripŋi ehi dop köliga keuŋi jim teköiga solaniyök.
7Kembunöŋ toroqeba keu kewö jii mörök, “Nöŋön Kembu akzal. Gi Kaldia gölmegö miri qetŋi Ur miaŋgöreŋ malnöŋga goaŋgita ki kait. Gölme ki gihibi buŋa qem aŋgumangöra aka gi goaŋgita ki kait.”
8Mewö jiyökmö, Abramnöŋ kewö jiyök, “O Kembu ketaŋamni, gölme kiaŋön nöŋgö buŋaya akŋawi, mi mönö wani aiwesöha eka möt kutumam?”
9Mewö jiiga Kembunöŋ yaŋgöra kewö jiyök, “Gi mönö anda bulmakau ambi seramŋi yambuŋi karöbut, meme (noniŋ) ambiŋi yambuŋi karöbut aka lama aziŋi yambuŋi karöbut aka kembö kun aka kembö supsup dölökunŋi kun mi memba nöŋgöreŋ kaman.”
10Mewö jiiga Abramnöŋ anda mi pakpak körek memba kaba sömbup mi bibiŋine qesiŋ eŋgiba likepŋi likepŋi mi areŋgöiga köna likep likep aröŋnöŋ ahöget. ▼
▼Nalö miaŋgöreŋ jöhöjöhö areŋ aka mi silik mewöŋi miaŋön mem köhöizema. Azinöŋ sömbup likepŋi yahöt mietkö sutŋire kinda mindirim etkiba jöhöjöhö mi tönguba galöm köljapma.
Mewö ahökmö, nei mi qahö qesiŋnök. 11Qahö qesiŋda qamötŋini likep likep areŋgöm eŋgiiga nei kalŋi yeŋön kaba qamöt yeŋgö qakŋine eta kölgetmö, Abramnöŋ mi közöl eŋgiiga anget.12Wehön jeŋi teköba gemamgö aiga nalö miaŋgöreŋ Abramnöŋ jeŋi eta meiga gaun lömbötŋi ahöyök. Mewö ahöiga pandaman göjiwinaŋgö kanjamŋi miaŋön kaba turum waŋgiyök. 13Turum waŋgiiga Kembunöŋ kewö jii mörök, “Keu ki mönö ölŋa mötman: Göhö gwölönarökurupkan mönö nanŋini gölmeŋini mosöta kantri kunöŋ anda kiana mala mal öŋgöme. Mewö mala yeŋgö welenqeqeurupŋini omaŋi aketka i yambu 400:gö dop tulumgöm eŋgiba malme.
14Mewö malmemö, nöŋön kantri welenqeqeurupŋini omaŋi aka malmei, yeŋgö keuŋini mewöyök jim teköba likepŋi meleŋbiga qakŋine öŋgöma. Mewö mi öŋgöiga pösat eŋgigetka kantri mi mosöta sukinapŋini gwötpuk memba liliŋgöba kame. 15Nöŋön Amor könagesö mi gölme kiaŋgöreŋ zilaŋ qahö eŋguataŋgömam. Mutuk siŋgisöndokŋi siŋgisöndokŋi aka bölimqölim tekögetka likepŋi törörök meleŋ eŋgimamaŋgö nalöŋan akŋawi, nalö miaŋgöreŋ mönö i eŋguataŋgömam. Miaŋgöra göhö isiurupki yeŋgö isiurupŋinan asuhuba malmei, ▼
▼Yambu 430 nalö mi kewö oyoŋget: Liwainöŋ malmal yambuŋi 137 miaŋgöreŋök yambu 80 mi Ijipt malök. Yaŋgö andöŋe azi kewöŋan yambuŋini kewö Ijipt malget: Kehat 133, Amram 137, Moses 80. (Miaŋgö andöŋe Mosesnöŋ Ijipt mosöta toroqeba yambu 40 malök.) Mi mindiriba yambu 430 ahök. Ex 6.16,18,29 Dut 34.7
nalö miaŋgöreŋ göhö gwölönarökurupkan mönö liliŋgöba ki kame. (15) Yeŋön mewö kamemö, nangak mutuk yambugahö nalöŋi ölöm kömuiga luainöŋ iwiasaurupki yeŋgöreŋ anöŋga löm köl gihime.”17Kembunöŋ mewö jiiga wehön jeŋan teköba geiga pandaman meiga yuai kewö asuhuiga ehök: Kimbut kungö uruŋe könöp bölamŋan kököbilikbilikŋambuk jeba asariiga köwak köndumŋambuk pukpuköyök. Yuai miaŋön asuhuba sömbup qamöt qesiŋqesiŋi mieŋgö sutŋine kinda anda kayök.
18Kembunöŋ mewö sömbup likepŋi likepŋi mieŋgö sutŋire anda kaba sömaŋ miaŋgöreŋ Abrambuk jöjöhö areŋ aka (kaisöpsöpŋan mi mem köhöiba) keu kewö jii mörök, “Nöŋön gölme ki mi göhö gwölönarökurupki yeŋgö buŋaya qem engimam. Miaŋgö jaböŋi mi Ijiptkö o töwatŋi (Nail) miaŋgöreŋök könahiba kaba ki oŋgita anda o töwatŋi ketaŋi qetŋi Yufreitis miaŋgöreŋ teköma. 19Nalö kewöŋe mi könagesö kewö yeŋgö gölmeŋina ahöza: Kin könagesö, Kenas könagesö, Kadmon könagesö, 20Hit könagesö, Periz könagesö aka Refaim könagesö, 21Amor könagesö, Keinan könagesö, Girgas könagesö aka Jebus könagesö. Yeŋgöreŋ gölme pakpak mi mönö körekŋanök memba dop köla anme. “Mewö. c
Copyright information for
BMU